नेपाली कम्युनिष्ट पार्टी (नेकपा) का संयोजक पुष्पकमल दाहाल ‘प्रचण्ड’ले अहिले देशमा विवेक, विचार र सिद्धान्तभन्दा आवेग, पूर्वाग्रह तथा निरङ्कुश प्रवृत्ति बढ्दै गएको भन्दै सरकारको आलोचना गरेका छन्।
मंगलबार काठमाडौंमा आयोजित नेपाली कम्युनिष्ट पार्टी र नेपाल कम्युनिष्ट पार्टीबीचको एकता घोषणा कार्यक्रममा बोल्दै उनले जनतालाई चिमोट्ने, भुत्त्याउने र सबैलाई आतङ्कित पार्ने विवेकहीन प्रवृत्ति मुलुकमा हाबी भएको बताए।
देशको यही आवश्यकतालाई मध्यनजर गर्दै विवेक, विचार, सिद्धान्त र जनताको देशभक्तिपूर्ण आन्दोलनका पक्षधरहरू फेरि एकताबद्ध हुन जरुरी रहेको उनले बताएका थिए।
मुलुकलाई सही दिशामा अगाडि बढाउन नेपाली कम्युनिष्ट पार्टी फेरि एकपटक तयार रहेको उनको दाबी छ।
विभिन्न ठाउँमा पुग्दा आफूहरूमाथि आलोचना र विरोध हुने गरेको स्वीकार गर्दै उनले विगतका कमजोरीको समीक्षा गर्नुपर्ने आवश्यकता औँल्याए। आफ्ना कमजोरीबारे खुलेर बोल्न र आत्मसमीक्षा गर्न डराउन नहुने उनको भनाइ छ।
‘यतिबेला देशमा विवेक हराएको छ। राज्यमा विचार हराएको छ। आवेग, आग्रह, पूर्वाग्रह, निरङ्कुशता, अराजकता, जनतालाई चिमोट्ने, भुत्त्याउने, सबैलाई आतङ्कित पार्ने प्रवृत्ति, विवेकहीन प्रवृत्ति हाबी छ। हामी विवेकका पक्षधर, विचारका पक्षधर, सिद्धान्तका पक्षधर, जनताको देशभक्तिपूर्ण आन्दोलनका पक्षधर एकचोटि फेरि एकताको झण्डा उठाएर जानुछ,’ उनले भने।
- न्युज एजेन्सी नेपाल
